რატომ უნდა ვიცნობდეთ ლაშა დევდარიანს ?

Cover photo Grigor Devejiev

  „ჩემო კალამო, ჩემო კარგო , რად გვინდა ტაში?!“ . არ შემიძლია, რომ ჩემი დღევანდელი სტატია ილიას გენიალური სიტყვებით არ დავიწყო, ვინაიდან სწორედ ეს ფრაზა გამოხატავს ყველაზე კარგად ლაშა დევდარიანის მის შემოქმედებისდამი დამოკიდებულებას.
 კამერები არ უყვარს, ქართულ შოუ-ბიზნესზე ეღიმება და სახელისთვისაც დიდად არ იბრძვის. ის უბრალოდ ჭეშმარიტი შემოქმედია, რომელიც სიამოვნებას იღებს თავისი საქმით. ცხადია, აქვეა კომერციული ინტერესი, რომლის გარეშეც დღეს მოდა არ არსებობს.

  ლაშა დევდარიანი ის ქართველი დიზაინერია, რომელმაც საქმიანობა ნულიდან დაიწყო და განვლილ ნაბიჯებს არც მალავს.
 არ ერიდება იმის გახსენება, რომ მიმტანად მუშაობდა და არც ის დაუმალავს, თუ როგორ იყო მისდამი განწყობილი ბევრი ქართველი „მოდის მოყვარული“.
 მოკლედ, თუ სამოტივაციოდ რაიმე კარგ თემას ეძებდით, სწორედ იქ მოხვდით, სადაც საჭიროა.

Photocredit Vazhak

  ცოტამ თუ იცის, რომ ჯერ კიდევ წლების წინ ქართველი მოდის სფეროს წარმომადგენლები დამწყებ დიზაინერს დიდად არ აფასებდნენ. ლაშა ამას არც ითხოვდა და საზოგადოების აზრი არც არასდროს არ ადარდებდა. თუმცა, ერთ დღეში შექმნილმა პირველმა საკონკურსო კონცეპტუალურმა კოლექციამ ჯერ კიდევ ნაკლებად ცნობადი, თბილისში სტუმრად ჩამოსული დემნა გვასალიას მოწონება დაიმსახურა.

Photocredit Vazhak

  ლაშას ეს კოლექცია იმ პერიოდში ტენდენციური დეტალებისგან არაგამოყვანილი სილუეტებისა და მონოქრომული ფერებისგან შედგებოდა. პოდიუმზე იდგა შეზღუდული ქალი, რადგან სამოსი მის სხეულს არ გამოხატავდა.
 ლაშა დღემდე თვლის, რომ დემნას მისდამი სიმპათიამ დიდად იმოქმედა ქართველთა შეხედულებაზე. სწორედ, დემნა იყო პირველი ადამიანი, ვინც ლაშას შემოქმედებაში დიდი პოტენციალი შენიშნა.

Photocredit Vazhak

  2013 წელს გამართულ „Benext"-ზე ლაშამ რიგით მეორე კოლექცია წარმოადგინა და პრიზად ფლორენციაში სწავლა დაუფინანსეს.
  მეორე წელს კონკურსზე კვლავ მიიღო მონაწილეობა. კონკურსს ესწრებოდა გურამ გვასალია, რომელიც იმ პერიოდში პარიზში რია ქებურიას ბრენდ-მენეჯერი იყო. ლაშამ გურამის პრიზი, პარიზში სტაჟირება მოიგო.
 პარიზიდან ლაშამ ლონდონში გადაინაცვლა, სადაც გურამ კოტეტიშვილთან ერთად კოლაბორაციული კოლექცია წარმოადგინა ეთნიკურ თემაზე. ასევე, მიიღო შემოთავაზება სარა მაუერისგან.

Photocredit Vazhak

  მოგვიანებით მიხვდა, რომ ფოლკი და ტექსტილი ბაზარზე ყველაზე კარგად იყიდებოდა, ამიტომ შეცვალა ბრენდის კონცეფცია და გააკეთა გამოფენა იაპონიაში. იაპონურმა კულტურამ ასევე დიდი გავლენა მოახდინა მის შემოქმედებაზე.

Photocredit Zaqaria Chelidze 

  ამ ეტაპზე დიზაინერის სამოსი ყოველდღიური, ბოჰემური და თავისუფალია. მის მომხმარებელს საკმაოდ გამოკვეთილი პერსონა აქვს, რადგან თუნდაც შავი ფერის ხალათი ქუჩაში დიდ ყურადღებას იქცევს.
  ბოლო კოლექცია ლაშამ თბილისის მოდის კვირეულზე „პერფორმანსის“ სახით წარმოადგინა. კოლექცია იტალიისა და იაპონიის "Vogue"-მა დადებითად შეაფასა.

Photocredit Vazhak

  ერთი სიტყვით, ლაშა დევდარიანს დღეს მსოფლიო მაშტაბით ბევრ ქვეყანაში იცნობენ და კონცეპტუალურ დიზაინერთა შორის გამოარჩევენ.
  დიზაინერის ნიშა ეთნიკური თემა , იდეა და რთულად ხელმისაწვდომობაა. ლაშამ კარგად იცის, რომ საზოგადოებას ყოველთვის რთულად ხელმისაწვდომი ნივთები და სამოსი იზიდავს. ის მუდმივად სწავლობს და მოდას ფეხდაფეხ მიყვება. თავისი თემატიკითა და ინტუიტური ჭვრეტის უნარით ლაშა დროს რამდენიმე ნაბიჯით უსწრებს.

Photocredit Vazhak for City Magazine 

   თბილისის მოდის კვირეულზე მისმა გამოჩენამ დაადასტურა, რომ მის შემოქმედებაში აქტიური პერიოდი დაიწყო და დიზაინერი მზად არის ცვლილებებისთვის. ალღოს აღება - აი, ყველაზე ფასეული უნარი დღეს. ვფიქრობ, ლაშამ იპოვა ის ხელწერა, რომელიც დაეხმარება მსოფლიო მასშტაბით სახელგანთქმულობაში თუ არა, გაყიდვების ზრდაში მაინც. თუმცა, არ გამოვრიცხავ, რომ დიზაინერმა შესაძლოა გარკვეული ტიპის ცვლილებებიც შეიტანოს კონცეფციაში, მომხმარებლის ინტერესების გათვალისწინებით.

Photocredit Vazhak

 მოკლედ, თუ ჯერ კიდევ მის შემოქმედებას არ იცნობთ კარგად ჩაინიშნეთ ეს სახელი და გვარი. მალე ლაშა დევდარიანი მსოფლიოს ერთ-ერთი ყველაზე მაღალ ანაზღაურებადი კონცეპტუალური მოდის დიზაინერი გახდება.

Photocredit Giorgi Kardava